Relikviesamlar på ville vegar?

Sidan norske media ikkje flaumer over av stoff frå kyrkja i Irland for tida tar St. Isidors minne på seg å opplyse om dei underlege tjuveria som råkar kyrkja for tida. Vi startar med det siste, sidan det var det som gjorde meg merksam på det som skjer, og det er i tillegg kanskje det mest spektakulære.

Laurentius sitt hjarta medan det framleis var på plassen sin
i Christ Church Cathedral i Dublin.
Biletet er henta frå Wikimedia Commons.

I Dublin ligg den anglikanske katedralen Christ Church Cathedral. Fram til helga har denne kyrkja, som ser svært vakker ut, hatt eit relikvie av den heilage Laurentius O'Toole som er skytshelgen for byen og spelte ei viktig rolle i nasjonaliseringa av den irske kyrkja på 1100-talet. I eit hjarteforma skrin har kyrkja oppbevart hjarta til Laurentius heilt fram til 3. mars i år. Ein eller annan gong i løpet av dagen har tjuvar tatt med seg hjarta hans. Tjuvane har ikkje brydd seg med å ta med seg lysestaker av gull eller andre verdifulle ting det hadde vore mogeleg å selgje. I staden har dei brote seg gjennom eit jerngitter og tatt med seg berre dette relikviet. Som ei talskvinne for kyrkja seier:  "It's completely bizarre. They didn't touch anything else. They specifically targeted this. They wanted the heart of Saint Laurence O'Toole."

Kista som inneheldt relikvia frå St. Brigid.
Biletet er henta frå kyrkja si nettside.

Dette er som sagt ikkje det første pussige tjuveriet frå irske kyrkjer. I januar tok nokon seg inn St. Brigid's Church i Killester i Dublin. I kyrkja hadde ein gjort seg klar til å feire Brigid, og hadde derfor tatt ut relikvia av Brigid, ein bit av skallen hennar, frå kista dette vart oppbevart i, sidan kista skulle fiksast på. Tjuvane tok med seg den tomme kista, som var skrudd fast i alteret i kyrkja.


På dette tidspunktet hadde Holycross Abbey i Tipperary allereie fått attende det som var stole frå dei. I oktober tok nokon seg inn i klosteret og stal det ein reknar som ein del frå Jesu kross. Krossresten kom heim til klosteret på nyåret, utan at det går fram frå rapportane at ein veit kven som hadde tatt dei med seg.

Slik er altså stoda på den grøne øya. Relikvia forsvinn av ukjende grunnar. Kanskje har ein å gjere med ein særs lite from relikviesamlar?